TENGKA
Aponapa covid e Madura kadinto cepet nular? Bannyak alasan tor pamanggi. Coma den kaule bhedi abahas secara khusus soal tengka, se kadimma tengka kadinto daddi wasilah penyebaran covid jugen. E bekto tengka, oreng akompol dalem jumlah se bannyak. Kadinto se esambat "kerumunan". Karena virus kadinto nular lebat lobang lesan, elong, tor mata, dalem arte lebat papanggiyen se semma' (close contact) maka e dalem tengka sadejana ampon cokop syarat kaaangguy daddhi panularanna virus. Ponapana pole e tengka kalebat rang-rang oreng taat prokes misal epon amaskerran, ngangguy "hand sanitizer" ben tada' jara'.
Matada' tengka tak mungkin ben ta' masok akal kaangguy reng madhura. Asabab tengka ampon daddi tradisi se menghubungkan antara settong oreng ben oreng laenna. Manabi ta' entar misal epon ka pernikahan otabe ka kifayah kadinto oreng se ta' entar apangrasa sala, maske alasan epon kaangguy ta' entar cokop syarat e musim pandemi kadinto. Kadinto se istilah madura tako' andi' "otang tengka. Ponapa pole sanksi sosial ka oreng se ta' entar cokop berra' karana eanggep ta' pabele (ta' nagnggep famili), ta' pelak (gate), akaton odi'a kadhibi'. Tor kadang sampe kadiye bhede ancaman, " senga' bile mate, etengguwa kabadaanna".
Den kaule andi' keyakinan tengka kadinto mangken ampon daddi wasilah penyebaran covid. Angka oreng se adinggal ampon tak wajar. Sadeje oreng se adinggal tanto banni covid sadeje, coma dari ciri-ciri epon bannyak jugen se adinggal asabab ecapo' covid. Toa ngude bannyak se sessek nafas epon.
E Madura manabi bhede oreng sake' se nyapot jugen bannyak. Kadinto bagus. Coma e bakto kadiye mangken sulit nebbak ponapa se sake' ecapo' covid ponapa bunten. Manabi covid tanto kadinto bisa daddi wasilah penularan jugen. Saenggana oreng se nyapot bisa bai ecapo' tolare. Ben e disa tertentu bhede oreng se nyapot reng sake' olle berampa are sake' demam, sessek nafas epon (tapegga) ben daddi adinggalla.
Den kaule ta' gaduan pamanggi, kadhiponapa jalan keluar malle tengka ta' daddi wasilah penyebaran covid. Kadiye pamator gellak tengka kadinto ampon daddi adat, settong lalampan se cokop kowat se ta' gampang eoba.
Tape manabi noro' lalampan reng Madhura, bhede jugen se kasedaan (kapateyan) tak narema acara. Mungkin kadinto bisa eterrabegi e saat pandemi kadinto, maske kadiye kaator ta' gampang. Manabi tahlilan tetep kodu laksanaagi, coma kalaben prokes. Tape ta' mungkin shahibul musibah nyoon ka oreng se atahlil ngangguy masker. Sabagian reng Madhura kadinto ngambulan, manabi epakon ngagguy masker, bisa saos bannyak se ta' atahlil. Daddi kadinto lakar abali ka kesadaran bi' dhibi'.
Manabi pernikahan mungkin se sae e tunda dhimin. Manabi tettep elaksanaagi, undangan epon tak manabi bannyak. Cokop anggota keluarga saos ben tatangga. Soal salamedan (resepsi) epon bisa etunda lastarena kabadaan ampon sae.
Den kaule lakar "buru budu". Gi' ta' manggi pamanggi se sae kahiponapa ajalanani tengka e musim pandemi kadinto. Mungkin bhede pamanggi dari penjenengan. Ngireng ....
KIAI AHMAD DARDIRI ZUBAIRI
Wakil Ketua PCNU Sumenep
#GenerasiMudaNUMadura
#GenerasiMudaNU
Tidak ada komentar:
Posting Komentar